ما عدا هذا ( الرجل )
بقلم : أحمد
عبد العزيز
هذا التعبير سمعته
علي ألسنة كثير من المصريين بلهجة عامية خالصة وحاسمة ( كله.. كله إلا الراجل ده )،
ولما استفسرت عن الرجل المقصود بهذا التعبير ضحك قريبي وقال لي هو فيه حد في مصر
مش عارفه !!! تعالي نقعد مع الشلة وهمه يعرفوك اللي بتقوله الناس في كل زقاق وحارة
وفي الجلسات الشعبية وفي الغيطان، ولما قعدنا علي المصطبه آخر النهار، وبعد السلام
والتحية والتعارف سأل صاحبي السؤال إياه : مين هو الراجل المقصود ب" كله كله
إلا هو " هنا طرقعت الضحكات وردوا في نفس واحد" اللي ما يتسماش"،
اللي خربها وقعد علي تلها" ضحكت في داخلي وفهمت، وكان رد الكل وكأنهم علي قلب رجل واحد، في الانتخابات اللي
جايه هننتخب أي شخص وأي حد في هذا البلد غير حسني مبارك وغير حزنه" يقصدوا
حزبه بالباء مش بالنون "،وقال واحد من الجالسين نريد رئيسا آخر غير
مبارك،عايزين نغير الصنف، وليكن هذا الشخص من يكون إلا هذا الرجل، لا تصدق من يقول
" اللي تعرفه أحسن من اللي ما تعرفوش"، لأنه مهما بلغ السوء بالرئيس
الجديد هيكون أفضل ألف مرة من رئيس قعد طول فترة حكمه(24 سنة) بيتكلم عن أن بكره
أسوأ من النهارده، يعني مفيش أمل، ويقول أعمل لكم إيه وأنتم بتكتروا، بزمتك ده
ينفع رئيسمجلس قرية؟؟؟ مش دولة لأ ؟؟ الرئيس نسي إن عدد الشعب المصري لا يساوي
شيئا بجانب عدد سكان الصين وللا الهند.ولما
شايفها سوده قاعد علي قلبنا ليه طول المدة دي وعايز يكمل ..عجبي!!!!!!
ما عدا هذا الرجل
تسمعها في كل مكان بين الزملاء والأصدقاء وعلي المقاهي وفي الجلسات الخاصة وبين
المثقفين الشرفاء وفي الجامعات، واحد منهم قال " تفتكر فيه إيه بعد ما بقينا
زباين في طوابير العيش ثلث مرات في اليوم ، مع إن العيش لا يصلح للحيوانات ولا
للبهائم"،بعد الأسعار اللي زي النار "بعد المدارس ما اتحولت لأوكار
للدروس الخصوصية والآخر اولادنا يقعدوا في الشارع بدون شغل" فيه إيه بعد
المرتب الهزيل اللي ما يكفيش عيش ولا فاتورة كهرباء ولا إيجار " عايزني أقول
إيه بعد الغش اللي ملأ حياتنا من الخضر للفاكهة للحوم، بعد الرشاوي في السجل
المدني والشهر العقاري وأقسام البوليس والفيش والتشبيه والمرور والرخص، حتى الكلام
في التلفزيون والجرايد من بتوع الحكومة كله كدب وخداع وضحك علي الدقون " بعد
الشوارع والمواصلات ما بقت غابة للبشر لا أخلاق ولا دين ولا إحساس، بعد ما أصبح
ولادنا اللي اتخرجوا من الجامعة من عشر سنين بياخدوا مصروف من لحم الحي، بعد ده
كله عايزني أقول إيه؟؟؟؟ عايزني أقول عاش اللي سرقونا عايزني أبيع ضميري وارفع
صورهم زى الدراويش بتوع الطرق الصوفية والهبل والمعاتيه بتوع عشش الصفيح من عزبة
أبو قرن والجيارة وأكشاك أبو السيد اللي بيشتروا الذل والجوع بـ20 جنية اللي باعوا
شرفهم وكرامتهم وباعوا أحلام الفقراء بـ 10 جنيه، ولا ممكن أكون سمسار زي " الست
اللي اسمها إيمان بيبرس!!!.
كله ...كله إلا
الراجل ده.. ده الشيطان ممكن يكون أحسن منه؟؟؟ لما استغربت رد عليّ زميله وقال لي،
شفت رئيس يقابل الصهيوني " شالوم بالأحضان ويقابل شعبه بالهراوات والدروع
ويسلط عليهم الزبانية بالقنابل المسيلة للدموع!!!!!،شفت رئيس بيفرج عن الجواسيس زي
عزام ويعتقل أي مسلم بدون ذنب عشرات السنين!!!!!
رد واحد ثالث وقال "
والله الراجل ده إيامه سودة، إوعي تصدق اللي بيطلعوا في التلفزيون ويهلفطوا باسم
الشعب، لو دققت النظر تعرف إن دول مأجورين، هو فيه حد في البلد عارف يعيش ولا يحس
بكرامته، يقولولنا حزب آل إيه وطني وهو حزب العفن والكروش المليانه حرام، هو حزب التزوير والتهليب.
بعد ده وغيره كتير مش
عايز الناس تضج وتقول" كله إلا حسني مبارك ..كله إلا الراجل ده... خلاص شبعنا..وقرفنا..
وكفاية 24 سنة بهدله... كفاية فقر وقلة قيمة.
والله العظيم عندهم
حق كله إلا الراجل ده هو وعيلته وحزبه